اعداد : منه الله ابراهيم لدسوقي
مشروع “الخرسانة الخضراء” – كلية هندسة كفر الشيخ
في ظل التحديات البيئية المتزايدة التي يواجها العالم في الوقت الراهن، أصبحت التنمية المستدامة هدفًا رئيسيًا تسعى إليه جميع القطاعات، وعلى رأسها قطاع البناء والتشييد. ومن هذا المنطلق، ظهر مفهوم “الخرسانة الخضراء” كبديل صديق للبيئة عن الخرسانة التقليدية، حيث تسهم في تقليل الانبعاثات الضارة والحفاظ على الموارد الطبيعية، إلى جانب كونها أقل تكلفة وأكثر كفاءة. ولمعرفة المزيد عن هذا الابتكار، أجرينا هذا الحوار مع المهندس أحمد، المتخصص في الهندسة المدنية، ليحدثنا عن خصائص الخرسانة الخضراء وفوائدها واستخداماتها
في البداية، ممكن توصف لنا فكرة المشروع اللي اشتغلتوا عليه؟
طبعًا، إحنا اشتغلنا على ابتكار اسمه “الخرسانة الخضراء”، وهي نوع من الخرسانة بيتم تصنيعه من خلال إعادة تدوير المخلفات زي نشارة الخشب، وده بيخليها صديقة للبيئة وغير ملوثة. الهدف الأساسي منها هو تقليل انبعاث الكربون، توفير الطاقة، وحماية الموارد الطبيعية.
من اين جاءت هذه الفكرة؟
بصراحة إحنا لاحظنا كمية المخلفات اللي بتترمي يوميًا، وخاصة من الخشب وغيره، وبدأنا نسأل نفسنا: “ليه ما نستفدش من الحاجات دي بدل ما نرميها؟” ومن هنا بدأنا نبحث ونقرأ عن الخرسانة الخضراء اللي بدأت تنتشر في بعض الدول، وقررنا نطورها بأسلوبنا وننفذها بإمكانياتنا هنا في مصر.
متى تم العمل على هذا الابتكار ؟
المشروع ده بدأ في كلية هندسة كفر الشيخ سنة 2024، والحمد لله حقق نجاح كبير
إيه الفرق بين الخرسانة الخضراء والخرسانة العادية؟
الفرق الأساسي إن الخرسانة العادية بتحتاج لمواد زي الأسمنت والركام، ودي مواد مكلفة وبتستهلك طاقة كبيرة في تصنيعها، لكن الخرسانة الخضراء بتعتمد على تدوير المخلفات وده بيوفر في التكلفة وبيحافظ على البيئة.
طيب إيه المميزات الميكانيكية اللي بتميز الخرسانة الخضراء؟
الخرسانة دي بتحافظ على الخصائص الميكانيكية الأساسية المطلوبة للبناء، زي الصلابة والمتانة، وفي نفس الوقت بتقلل انبعاثات الكربون، وبتقلل استهلاك الطاقة، وبتساهم في حماية الموارد المائية.
هل في استخدامات محددة للخرسانة دي؟
المهندس أحمد: طبعًا، بنستخدمها في المباني الرسمية، والطرق، والمباني التجارية، وده لأنها أثبتت كفاءة كبيرة وبتساهم في التنمية المستدامة.
مين اللي بيمول المشروع ؟
الدولة هي اللي بتدعم وتمول الابتكار ده، لأنها شايفة إنه مشروع هيوفر كتير وهيفيد البيئة والاقتصاد.
هل الخرسانة الخضراء بتتحمل نفس الظروف المناخية الصعبة زي الخرسانة العادية؟
أيوه، إحنا عملنا اختبارات كتير عليها ولقينا إنها بتتحمل درجات الحرارة العالية والرطوبة والبرودة زيها زي الخرسانة التقليدية، وأحيانًا بتكون أكفأ كمان.
هل في صعوبات وجهتكم أثناء تنفيذ المشروع؟
أكيد، في البداية كان في تحديات في توفير المواد الخام من المخلفات ومعرفة النسب المثالية للخلطة، لكن مع الوقت والتجارب قدرنا نوصل لتركيبة ممتازة.
هل في خطط لتوسيع استخدام الخرسانة الخضراء على مستوى الجمهورية؟
حاليًا في تنسيق مع جهات حكومية وشركات مقاولات علشان يتم استخدامها بشكل أوسع في المشروعات الجديدة.
هل النوع ده من الخرسانة آمن تمامًا على البيئة؟
المهندس أحمد: طبعًا، هي مصممة بالأساس علشان تكون صديقة للبيئة، وبتقلل من تراكم المخلفات والانبعاثات الضارة.
تنصح الشباب والطلاب بإيه علشان يقدروا يعملوا مشاريع زي دي؟
أنصحهم يشتغلوا على أفكار بتخدم المجتمع والبيئة، ويشتغلوا بروح الفريق، ويستغلوا الموارد اللي حواليهم بشكل ذكي وعملي.
.
